النهاردة انا جايبالكوا موضوع يفيد كل بنت وهو كيفية العناية بالقدمين في المنزل.
انا كنت عايزة أعمل عناية للقدمين عندي وأعدت أعمل سيرش ولقيت معلومات جميلة جدا جدا وحبيت انكوا تشاركوني المعلومات دي. الأول طبعا كلنا عارفين أو لازم نعرف ان القدمين هما مركز لأعصاب كتير في الجسم، عشان كده راحة القدمين برضه بتيرح الأعصاب دي، يعني مش لازم أبدا اننا نهمل القدمين خاصة انهم جزء مهم في العناية بالجسم، يعني مش حلو لما تكون بنت أمورة وحلوة كده والقدمين عندها فيهم مشاكل، لازم تهتمي بيهم ومش تسيبيهم ومافيش حاجة ملهاش حل، القدمين بالذات أكتر حاجة بتتمر فيها العناية يعني تديها عناية تلاقي النتيجة من أول يوم هتشوفي الفرق حتى لو عملتي حمام ميا دافي بس من غير إضافات.
يللا هبدأ معاكوا ان شاء الله الخطوات البسيطة للعناية وبعدين ندخل على الأقوى بعدها
1- الكعب العالي حاولي تتجنبيه بقدر الإمكان لأنه مضر بالقدم والظهر كمان، ولو اضطريتي تلبسيه اعملي حمام ماء دافي لما ترجعي مع التدليك.
2- كمان الأحذية الضيقة غلط على القدمين حاولي تتجنبيها وبرضه لو اضطريتي يبقى تعملي الحمام الدافي ليها بالملح.
3- غير كده وانتي خارجة لو بتلبسي جوارب أو أحذية مقفولة يفضل وضع البودرة الخاصة بالقدمين، عشان منع الرائحة وكمان منع انتشار فطريات القدم واللي ممكن لو تطورت تكون لها آثار سلبية سيئة جدا على القدمين ويفضل انك تلبسي جوارب ألياف طبيعية زي القطن مش ألياف صناعية لأن القطن بيساعد على التهوية وبيمتص العرق وبالتالي ما تنتشرش البكتريا في القدمين من العرق.
4- لما تيجي تقصي الأظافر يفضل عدم قصها أو تقليمها من الطرفين بعمق لأن ده بيخليها لما تطول تاني ممكن تدخل في الجلد وتسبب ألم، عشان كده يفضل انك تقصيها بشكل مستقيم متساوي وغير كده لا يفضل قص الأظافر وهي مبللة لأن ده بيأدي لتكسيرها أو تقصيفها.
5- إذا شعرتي بالحكة في القدمين إوعي تستسلمي للشعور ده لأن ممكن يسبب انتشار أسرع للفطريات لذلك قومي بغسل القدمين وتجفيفهما جيدا ثم ضعي كمادات ثلج أو ماء بارد حتى تشعري باختفاء هذا الشعور.
6- يفضل من فترة لأخرى تعملي تدليك للقدمين عن طريق بكرة أو كرة كما هو موضح بالصورة بحيث ان القدم كلها تتدلك مش منطقة معينة.
نيجي بقى للخطوات المتقدمة
